Гьикьван вуна уьмуьр гуда чарариз?
Маса кеспи лагь,ви рикlиз хуш тушни?
Рахадач вун зав,жеда са цlар кхьиз,
Чан Владик,зун ваз кlани руш тушни?
Лагь,гьикьван вун муьтlуьгъ жеда илгьамдиз?
Азад вахтни серфда гьакl чарар гваз.
"Шиир кхьин лезет я зи сагъламдиз",
Жаваб гуз заз-шиир кхьиз кlанда ваз
Дустар галаз жеда вун гагь кафейра.
Зун вуна гьич паркунизни тухудач.
Вун шегьердин къекъвез жеда куьчейра
Фейи чка заз эсиллагь лугьудач.
Ви тlвар даим ава рушар сивера,
Закай ваз ви гъил кьадай яр хъжедач.
Зи уьмуьр гьакl фена хьи ви демекда,
Чи ашкъидиз завай мад рум гуз жедач.
Къе ви дустар пулун юкьва къугъвазва,
Ви вилериз девлетар гьич аквадач.
Ктаб,журнал,шиирар ваз аквазва,
Девлетрикай вун захъ галаз рахадач.
И азабриз завай давам гуз жедач.
Ви крари зун михьиз бизар авунва.
Вахъ галаз гьич уьмуьр гьализ хъжедач.
Жуваз гъейри вафаллу яр за кьунва.
Такурай и гафарилай гуьгъуьниз,
Шиир кхьен,ам алемдиз чlукlурна!
А шиирди кьел вегьед зи хирериз,
Гьиссер рикlиз гьахьда беден чlагурна.