Нячысты дух беларускага барока
(П’еса ў дзвух дзеях).
ДЗЕЮЧЫЯ АСОБЫ:
Бадзяга/Дух Сімеона Полацкага – малады прайдзісвет і махляр, у мінулым – шкаляр.
Адам – настаўнік музыкі, у мінулым – шкаляр, сябра Бадзягі.
Базыль Валовіч – харунжы ў адстаўцы. Важны фанабэрысты пан з вялікімі амбіцыямі і вялікімі грашыма.
Аўгунія – маладая пані, дачка Базыля.
Тэкля – кузіна Аўгуніі з правінцыі.
Дзеянні адбываюцца недзе ў Вялікім Княстве Літоўскім напачатку XVIII стагоддзя.
Дзея 1.
На сцэне з’яўляецца Бадзяга.
Бадзяга (звяртаецца да гледачоў):
- Видите меня, как я муж отраден.
Возрастом велик и умом изряден.
Ума излишком, аж негде девати,
Купи, кто хочет, а я рад продати!
У вольных мастакоў
Заўжды лёс незайздросны,
Няма ў кішэнях грошай,
Адно гармідар розны.
Вось ад самога ранку
Бадзяюся па рынку,
Тут знойдзецца цыбулька,
Там нейкая скарынка.
На сцену выходзіць Адам. Ён трымае у руце кола каўбасы, адкусвае кавалак і смокча са смачным чмяканнем. Бадзяга і Адам заўважаюць адзін аднаго. Адам апрануты ў дарагі кунтуш. Бадзяга са здзіўленнем аглядае яго вопратку.
Бадзяга: - Адам, вітаю, хлопча!
Відаць цябе здаля!
Адам (са здзіўленнем): - Адкуль прынеслі чэрці
Бадзягу-круцяля?!
Бадзяга: - Даўно цябе ня бачыў.
Як быццам з тых часоў
Калі мяне прымусіў
Праклён святых айцоў
Калегіум пакінуць,
Старую Alma Mater.
А ты таксама, бачу,
Навукі не аматар?
Бадзяга з зайздрасцю глядзіць на каўбасу ў руцэ Адама, глытае сліну і цягне да каўбасы рукі.
Адам (хавае каўбасу за спіну): - Дык я яшчэ ў тым годзе
Закінуў іезуіцтва.
Стаў выкладаць сальфеджо
І здолеў пракарміцца.
Бадзяга: - Ды ну?..
Адам: - …Я выкладаю
Ігру на клавесіне
Адной заможнай пані
Ды нейкай там кузіне.
Каб у іх уладкавацца,
Прыкінуўся за немца.
А так бы мог і бацьку
Вучыць кідаць каленца.
Стары харунжы марыць
Прамоўцам сам зрабіцца.
Бадзяга: - І шмат дае даходу
Чароўная крыніца?
Адам: - Базыль Валовіч, бацька,
Заўжды ў цяжкіх турботах
Куды падзець тысёнцы
Нарабаваных злотых.
(Адам звініць у кішені манетами).
Уначы, нібы забаўкі,
Ён выклікае духаў…
Бадзяга: - Так, з боўдзілам такім
Не здохнеш з галадухі.
Патрэбна развітацца
З дукатамі панам…
Хадзем, я думку маю,
Здабытак – напалам!
Бадзяга бярэ Адама пад руку і яны разам сыходзяць са сцэны.
Дзея 2.
На сцэне з’яўляюцца Адам і Аўгунія. Адам садзіцца за клавесін, які стаіць на краю сцэны і пачынае граць. Аўгунія стаіць побач, яна выконвае арыю з італьянскай оперы.
На сцэне з’яўляюцца бацька Базыль Валовіч і яго пляменніца Тэкля. Яны выносяць на сцэну стол і тры крэслы, сядаюць вакол стала. У цэнтр стала Базыль кладзе вялікую талерку дагары дном.
Базыль: - Няма ў нашым Княстве
Прамоўцаў шмат вядомых.
І гэта ёсць спрычынай
Турботаў для Кароны.
Бракуе нават у Сойме
Паноў да спраў прыдатных…
А я, напэўна, быў бы
З Літвы паслом выдатным!
Аўгунія чуе бацькавы словы, спыняецца, хлопае ў далоні.
Аўгунія: - Ой, татачка, адразу
Мы б з’ехалі ў Варшаву!
Я б стала выпраўляцца
Ў тэатр нахаляву!
Штодзень сапраны з Рыму,
Люстэркі, дываны…
Тэкля: - Я з вамі! Адно тутай
Сядзім як бараны…
Базыль: - А як бы гэта справіць?
Аб тым, як не глядзі,
Спытаць нам трэба духа.
Адам, verstehen Sie?
Базыль ківае Адаму. Той садзіцца за клавесін і пачынае выконваць змрочную фугу.
Базыль: - Я выклікаць спрабую
Славутага паэта.
І сёння атрымацца
Павінна ўрэшце гэта!
Базыль, Аўгунія і Тэкля кладуць рукі на талерку. Базыль пачынае заклінаць.
Базыль: - Дух Сімеона з Полацка
Прыдзі хутчэй да нас!
На важныя пытаньні
Мы просім даць адказ.
З-за сцэны чуецца голас Бадзягі.
Бадзяга (страшным замагільным голасам): – Нашто душу турбуеш
Паэта Сімеона?
Аўгунія і Тэкля з віскам і скавытаннем хаваюцца пад стол. Базыль застаецца сядзець за сталом са збялеўшым ад страха тварам.
Базыль (разгублена): - Дапамажы зрабіцца
Прамоўцам выкшталцоным…
На сцэне з’яўляецца Бадзяга загорнуты ў чорны плашч. Яго твар схаваны.
Бадзяга: - Спачатку мертвым духам
Ахвяру прынясі...
Базыль (спалохана): - А што ахвяраваць мне?
Бадзяга: - Сто талераў дасі!
Базыль дастае з кашалька манеты, адлічвае патрэбную суму і кладзе іх пад талерку.
Бадзяга: - Каб быць прамоўцам трэба
Усталяваць дыханне.
Удыхні паветра, потым
Рабі практыкаванне.
Бадзяга робіць моцны ўдых, потым на выдыхе вымаўляе гукі “Аааа яяяяя оооо ёёёёё иииииии” і моцна лупіць сябя па грудзях кулакамі.
Базыль пачынае паўтараць за ім практыкаванне.
Аўгунія і Тэкля вылазяць з-пад стала і спалохана глядзяць на “Духа”.
Бадзяга: - А вы хто?
Аўгунія: - … Я Аўгун’я,
Яна - кузіна Тэкля.
Тэкля: - Спяваць хацім у тэатры,
Ці ў оперы…
Бадзяга (іранічна): - Ці ў пекле.
Бадзяга падыходзіць да Аўгуніі і Тэклі.
Бадзяга: - З іменамі такімі
Я б не вылазіў з хаты!
Аўгунія і Тэкля (разам): - А што рабіць?
Бадзяга: - Прынесці
Ахвяру. Ёсць дукаты?
Аўгунія вытрухвае на стол з кашальку бацькі апошнюю манету, хмурыць бровы, на імгненне задумваецца, потым выбягае са сцэны. Адначасова Тэкля дастае з кішэні медны грош, тупа глядзіць на яго некалькі секунд, потым кладзе назад у кішэню. Базыль увесь гэты час старанна вымаўляе гукі “Аааа яяяяя оооо ёёёёё иииииии” і моцна лупіць сябя па грудзях. Адам грае музыку. Прыбягае запыханая Аўгунія з вялікім куфэркам, вымае з яго некалькі бліскучых манет, кладзе грошы пад талерку, куфэрак пакідае на стале. Бадзяга задаволена назірае за Аўгуніяй.
Бадзяга (Аўгуніі): - Тваё імя для сцэны
ЛюмIна ЛУна. Гэта
Ў перакладзе значыць
“Святло начной Планеты”.
(Тэкле): - А ты для Добрай Славы
Завешся ГлОр’я БОна.
Аўгунія (у захапленні): - Трымчу я ад латыні…
Тэкля: - Фацэтныя імёны…
Бадзяга: - А зараз заспявайце.
Аўгунія дае знак Адаму. Той пачынае іграць. Аўгунія спявае арыю з італьянскай оперы. Тэкля паўтарае за ёй кожны наступны радок жудасна перакручваючы словы.
Бадзяга: - Стой! Хопіць той журботы…
Аўгунія і Тэкля (разам): - А что рабіць?
Бадзяга (Тэкле): -Ты будзеш
Пакуль трываюць боты
Скакаць угару і ўбокі,
Нагамі шморгай смела.
Бадзяга нахіляецца і адрывае ў Тэклі кавалак спадніцы, каб можна было ўбачыць ногі і панталоны.
Спявай на людскай мове,
Каб панства разумела!
Аўгунія з Тэкляй пачынаюць шаптацца, рэпеціраваць, рабіць танцавальныя рухі. Бадзяга падыходзіць да Базыля.
Бадзяга (Базылю): - Так, добра, пан прамоўца,
Ты ўжо падрыхтаваны.
Чытай уголас вершы -
Трыумф гарантаваны!
(Аўгуніі і Тэкле): - Пачнеце разам з бацькам
Шалёны свай паказ.
Вось файная батлейка!
Музыка, просім вас!
Аўгунія і Тэкля разам спяваюць арыю. Аўгунія выконвае радок па-італьянску, Тэкля паўтарае наступны радок па-беларуску. Пры гэтым Тэкля выконвае даволі вульгарны танец. Базыль гучна выгукае вершы і адначасова працягвае лупіць сябе ў грудзі кулакамі.
Бадзяга дырыжыруе, потым непрыкметна падыходзіць да стала, бярэ
пакінуты Аўгуніяй куфэрак, ссыпае туды ўсе грошы з-пад талеркі і ціха сыходзіць з куфэркам пад пахай.
Адам заўважае адсутнасць Бадзягі, спыняе ігру, падбягае да стала, бачыць знікненне куфэрка, падбягае да краю сцэны і крычыць наўздагон Бадяге.
Адам: - Стой, злодей, ашуканец!
Аддай мой ганарар!
Адам падбягае да Базыля, Аўгуніі і Тэклі. Тыя стаяць збянтэжаныя ад таго што змоўкла музыка.
Адам: - Паны, нас абакралі!
То быў ня дух, махляр!
Базыль (са здзіўленнем): - Вось цуд: я разумею
Нямецкі! Дзякуй духу!
Адам: - Нам трэба выпраўляцца
Ў пагоню шпаркім рухам!
Базыль (раззлавана): - Что ты вярзеш?! Нябожчык
Забраў свае ахвяры!
А нас чакае поспех,
Ён здзейсніў нашы мары!
Аўгунія: - У палацах заспяваем…
Тэкля: - …У багаценькіх уборах!
Аўгунія: - …Замежныя шпацыры!
Тэкля: - … Карэты на рысорах!
Базыль (звяртаецца да гледачоў) : - Бюджэты, спецэфекты,
Прыгожыя выяўкі,
Мы высмакчым з вас душы
Нібыта тыя п’яўкі!
Аўгунія і Тэкля зноў пачынаюць спяваць. Базыль таксама спрабуе ім падпяваць. Адам у здзіўленні. Ён падаецца назад, хоча сыйсці, потым вяртаецца, маша рукой, садзіцца за клавесін, грае. Да гледачаў у залю выходзіць Бадзяга са скрадзеным куфэркам у руках. На імгненне музыка змаўкае.
Бадзяга (гледачам): - Мы плацім, каб забыцца
Ў хімернай мітусне
На страх, несправядлівасць
Ды волю...Так, ці не?..
Бадзяга ставіць на падлогу адчынены куфэрак, кідае туды манету і сыходзіць. Вар’яцкі канцерт працягваецца.
ЗАВЕСА.
© Copyright:
Лёха Чыканос, 2012
Свидетельство о публикации №112080105584