Вун къе, чан руш, физва чарадан к1вализ
Чарадан к1вал ухшар язва уьлкведиз
Уьмуьр физвай табийдаказ къайдадиз
Муьт1уьгъни яз вичин гьахъдиз, къанундиз.
Варар вилик тура жуван назвилер,
Ая абрун хесетриз на гьуьрметар.
Эгер кьец1и ят1а - абрун хьухь к1вачер,
Буьркьуь ят1а - гьалда вуна айнаяр.
.
Ихтибарда вал къул к1валин
Эхиримжи югъ амай кьван.
Курай ама экв хьиз вилин
Рик1 хьиз курай к1анидан.
Алакь кутаз ч1ехи ц1аяр
Са ц1верек1дилай гъвеч1и.
Гъуьруькайни са мекевай
Фан хара чраз ч1ехи.
Вун къе, чан руш, физва чарадан к1вализ
Варарилай рекьер физвай гьар саниз.
Дикъетдивди килигиз хьухь вун чилиз,
Фикир ая ийизвай гьар камуниз.
Ширин гафар жеда чими нурар хьиз,
Рахадайла рахух верци мецелди.
Гафарни мад жеда залан фурар хьиз
Татугай гаф тахьурай гьич сивел ви.
Вун къе, чан руш, физва к1вализ чарадан
Ам ви рик1из хайи хьурай гьар къалай.
Вуч зат1 вилик атайт1ани чарадан
Экуь рагъни ам ширин ваз вирт хьурай.
Сиве сив тваз на гьуьжетар ийимир:
Бедбахтвал я эхир кьил а гьуьжетрин.
Гьич са гелни таз тахьуй жуван хъилен,
На ам циз вегь ц1урурай твар хьиз кьелен.
Вун къе, чан руш, физва чарадан к1вализ.
Вилер жеда вал кьуд патай килигиз,
Вун зи бегьер, вун я, бала, зи суьрет,
Ваз килигна гуда дидедиз къимет.
Абрун юкьва жуванди хьухь акахьна,
Итимдизни вун вафаллу паб хьана,
Уях хьухь вун аскерди хьиз лагьана:
Килиг шумуд инсан ава элкъвена?
Фазу Алиева "Материнский наказ дочери"