КIенташна Наурбекана, Казбекана
ТIеман куьрк латийна,
ТIедетташ хIоъ-молха,
ГIоьртича Теркехьа
Фашистийн гIера,
Дуьненчу ваьлла со –
Деден синмолха –
Сол хьалха хиларна
ЙоI, кIанттий делла.
Бераллин мур сан бац
Я сирла, я ховха:
Ши шо сан кхачале
Дай махках баьхна,
Цаьрца со, эгIаза, –
Кханенах догйовха,
Собарца ловш хилла
Халонаш къаьхьа.
Шелоной, мацаллой
Махкахой хьийзош,
Цамгарша Iожаллин
ДIаяьстича товха,
Сайн логшад Iаьвддина,
Сецадеш узарш,
Нанна со къежнера
Кханенах догйовха.
Йоманех къарзъелла
Беркъа тхан бедарш
Беламе йохучех
Тийсалуш, еш моха,
Тхо, хIетахь Даймахках
Бухдаьхна бераш,
Доьлхура, теш воцчохь.
Кханенах догйовха.
Доь кхио цIеннана
Харжар къаьстина,
Езарца воьдуш со сайн
Ирс цхьаьнатоха.
Ямартхойн кIелоно
Чевнаш еш вожор
Гечди, маслаIат деш,
Кханенах догйовха.
Мел гинчух гIан дина
Ши тIом лай махко…
Да ле сан, «эскархоша»
Юрт йолош кего…
И верзо йиш йоцуш
БIаьрзечу даго,
Ца оьккхуш, сатохар –
Кханенах дегйовхо.
Дел тIаьхьа зуламхойн
Карах ле ваша
(Иза вара харцонца
Чал дера довхо),
Бекхамна чIир хьеян
Бехкениг воцуш….
И вуо лан ницкъ белларг –
Кханенах дегйовхо
Мел лайнарг, мел гинарг
Йоза ду Делан, –
Ткъа бахьанаш адмех дуй-м,
Хууш дуй хьовха?
Ма хала хир дар-кха
Вуонна садетта,
Вай доцуш дисича
Кханенах догйовха!