Як жа моцна я люблю
Маму родную маю!
І яна мяне мілуе,
Абдымае і цалуе,
А галоўнае – штодзень
Мые ўсю мяне ў вадзе!
РАЗ – намыліць спінку мне,
Нешта добрае спяе.
ДВА – намыліць два бачкі,
Верш раскажа для дачкі.
ТРЫ – намыліць ручкі, ножкі,
Паказыча мяне трошкі...
А пасля – ЧАТЫРЫ, ПЯЦЬ –
Будзе мыць ды выціраць.
Як жа моцна я люблю
Маму родную маю!
Зноўку плёскае вада
У кватэры дацямна...
Маму абдыму за шыю
І ажно да слёз шкада:
Больш яе ніхто ня мые,
Бо дарослая яна!